Li Roges dau Miegjorn (libre Ièr : la Revolucion) — Ebook

NB : Pour des raisons touchant à la compréhension et à la conception du texte, le fichier EPUB est disponible uniquement en version "MISE EN PAGE FIXE".

Li Roges dau Miegjorn es lo primièr libre de la trilogia del meteis nom de Fèliç Gras, e es lo sol libre d’aquela trilogia editat del temps de l’autor, en 1896. Los autres dos, « La Terror » e « La Terror Blanca » esperaràn lo sègle XXI per èstre editats en occitan per « Prouvènço d’Aro ».

L’autor, jovenòt, aviá conegut Pascau, un vièlh sabatièr que, plan jove, « montèt » a París ambe lo Batalhon Marselhés en 1789. Lo roman li balha la paraula que servís d’entrada a l’epopèa revolucionària. La « montada » cap a París es a l’encòp un roman d’aventuras e una evocacion poderosa del vam revolucionari.

Dins aquel roman istoric – lo primièr en occitan – daissa passar un buf istoric plan fòrt que l’autor a l’engenh de pénher los tablèus animats per la multitud. Lo raconte avança a travèrs de scènas grandiosas ritmadas pels cants revolucionaris. Viatge de « Tres cènts lègas au pas de carga » entrecopat per las aventuras d’un amor d’enfança entre Pascalet e Adelina – dròlla d’un marqués – secutats totes dos per de bregands que se vòlon apropriar los bens de la dròlla aprèp aver assassinat son paire.

La lenga de l’autor, populara e pintoresca, conven remirablament a-n aquela cronica dels batalhons dels « Roges dau Miegjorn » fogosa e colorada.

Fèliç Gras (1844-1901), nascut a Malamòrt (Vauclusa) e mòrt en Avinhon. Notari, es ligat als felibres republicans, a l’Escòla Marselhesa e al Felibritge Roge. Es un dels « Roges dau Miegjorn ». Capolièr del Felibritge de 1891 a 1901, influenciarà mai las generacions joves coma capolièr que coma escrivan. Dins son òbra poetica, Lo Romancero Provençau (1887) es l’obratge mai capitat per sa beutat folclorica e son ritme. Podèm citar Li Carboniers (1876) e Tolosa (1882). A costat dels Roges dau Miegjorn, cal citar Li Papalinas (1891), ont trobam de racontes de la vida avinhonenca del temps dels Papas, una evocacion de la Comtessa de Dia e una legenda medievala.